د مصطفی سالک د شعر ژبه

چکیده

لنډیز

شعر هغه مخیله وینا ده، چې د الفاظو له اوډون څخه رامنځته کېږي، طبیعي ده چې شاعرانه الفاظ ښکلي او زړه راښکونکي وي، هر شاعر هڅه کوي داسې شعرونه ولیکي چې شعرونه يې لوستونکي ولري، خو دا هم یوه څرګنده خبره ده، و شعر هغه وخت لوستونکي درلودای شي، چې ژبه يې ساده، روانه او خوږه وي، تر څو د لوستونکي پر زړه او ذهن اغېز وکړي، د اغېز خبره بيا د شاعر په فکر او نوښت پورې تړلې ده، د دې مقالې سرلیک د مصطفی سالک د شعر ژبه ده؛ د پښتو ژبې فکري او نوښتګر شاعر دی، د ده د آثارو په لوستلو د لوستونکو د ادبي تندې د ماتې ترڅنګ د معلوماتو زېرمه هم پیاوړې کېږي، نو ما هم په دې مقاله کې د ده د شعري کتابونو څخه هغه بیتونه غوره کړي دي؛ چې د بیاني ښکلاوو ترڅنګ ښکلي شاعرانه ترکیبونه، عبارتونه او اصطلاحات لري. د دې څېړنې په ترسره کولو سره به لوستونکي د شعري ژبې سره آشنا شي او له دې څېړنې څخه زما موخه د سالک د شعري ژبې ځانګړتیاوې، ادبي سبک او د موضوعاتو تحلیل دی، په دې څېړنه کې له تشریحي مېتود څخه ګټه اخیستل شوې ده، چې د څېړنې ډول مې کتابتوني دی. د سالک شعرونه د طبیعت، عشق او انساني تجربو د تفکر انعکاس کوي، او له لوستونکو سره د یو ځانګړي احساس او تجربي ارتباط لري. دپایلې په توګه دا ویلای شو چې د ده شعرونه د احساساتو او تجربو یوه تازه او جذابه انځورگري وړاندې کوي. شعرونه یې د ژوند په مختلفو اړخونو، لکه عشق، درد، امید، تصوف او ټولنیزو مسایلو باندې تمرکز کوي. ښاغلي سالک پښتو ادب ته د شعر وشاعرۍ ترڅنګ ګڼ هنري نثري آثار هم ډالۍ کړي دي او  پښتو ژبې او ادب ته يې نه هېرېدونکي خدمتونه کړي دي.